Tum se Hain Rang Saray – تم سے ہیں رنگ سارے

“تم سے ہیں رنگ سارے” مخلتف ادوار میں لکھی گئی شاعری کا مجموعہ ہے جو سیدہ کی فنی قابلیت کی عکاس ہے۔ میں نے اس سے پہلے انکی شاعری کبھی نہیں پڑھی لیکن مجھے خوشی ہے کہ انہھں پڑھنے کا موقع ملا۔ اس کتاب کو لے کر میرا پہلا تاثر یہ تھا کہ اس میں زیادہ تر عورتوں اور feminism پر بات ہوگی جو کہ غلط ثابت ہوا۔ میرے لیے یہ بات حیران کن رہی کہ زندگی کے تقریباً 24 سال امریکہ گزارنے کے باوجود فرحت شیریں کی شاعری میں نہ صرف انکی اپنے وطن سے محبت پڑھنے کو ملی بلکہ لاہور اور پاکستان میں ہونے والے تازہ سانحات کا ذکر بھی ہے۔
“کاش۔۔۔
یہ میرا شہر اور اس کی محبت
یونہی اک روز اس دل سے اتر جائے
کوئی کب تک بھلا اُجڑے شہر کی داستان لکھے”
ننھی زینب سے لے کر 28 جولائی 2017 میں نواز شریف کے پاناما کیس کا فیصلہ سب پر انکی نظر رہی۔ غربت اور مفلسی کی چادر میں مٹی ہوتے خوابوں کی کہانی کا بھی تذکرہ ہے۔
“سب سے ملنا، سب کا کہنا سر آنکھوں پر
میرے اندر کا انسان چلو رہنے دو”
سیدہ کو اگر میں آج کے زمانے کی شاعرہ کہوں تو غلط نہ ہوگا کہ انہوں نے موجودہ دور کے موضوعات پر اپنے الفاظ سے خوشبو بکھیری ہے۔ ان میں Cinderella, Cyberspace, Part time, Party, Writer’s block, Braille, Blood Moon..میری پسندیدہ رہیں۔
“بہت دنوں کی تھکن تھی۔۔۔میں دیر تک سوئی”
خود کلامی اور خود فراموشی کے عنوان سے لکھی انکی نظمیں دل میں اترتی ہوئی محسوس ہوئیں۔
” بہت دن ہو گئے ہیں خود کو پا ئے
کہیں موسم بدلتا جا رہا ہے”
عورت ذات کے مخلتف روپ اور انکے ان کہے جذبات کی عکاسی بھی خوبصورت انداز میں موجود ہے۔
” عورت ذات تھی گھر میں رہتی تو اچھا تھا
دل کے رستے پر چل بیٹھی، بھٹکی ہوگی”
محبت کے عنوان پر انکی غزلیں اور نظمیں زیادہ تر محبت اور اس سے وابستہ توقعات اور ہجر و وصال پر مشتمل ہیں جو کہ بیہودہ الفاظ سے پاک ہیں۔ زیادہ تر نظمیں مکالمے کی شکل ہیں جو اپنے کسی دوست، ہم زاد یا خود سے کیے گئے ہیں۔
” آج بھی دل میں مانوس س احساس کوئی
دور جا کر بھی رہا مرے پاس کوئی”
Self Finding، آپ بیتی یا روز مرہ کے واقعات ہوں یا موسم کاحال ہو ، شاعری کی صورت میں پیش کرنا یقیناً انکا زبردست ٹیلنٹ ہے۔ انکے شعروں کی پختگی اور گہرائی کو دیکھتے ہوئے میں اتنا عرصہ انکے نام سے ناواقف رہنے پر افسردہ ہوں ۔ اگر آپ پروین شاکر اور عباس تابش کی شاعری کو پسند کرتے ہیں تو یقیناً یہ شاعری کا مجموعہ آپ
کے دل میں خود ھی اپنی جگہ بنا لے گا
” کبھی وقت ملا تو پوچھیں گے
تم کون سے دیس میں رہتے ہو
پھر۔۔۔ شاید تم نہ جان سکو
ہم کون سے دیس میں رہتے ہیں”